من قصائد الشاعر احمد الناصر الشايع

ليت العمـر ينبـاع والله لشريـه
وأروح للطيّـب وأزوّد سنيـنـه

وإلا الردي لعـل تقصـر لياليـه
ما من وجـوده فايـده خابرينـه

أفزع مع الطيّب عسى الله يخليـه
اللي لفعل الطيـب تبـذل يمينـه

خل الـردي لعـل تكثـر بلاويـه
ثقيـل دم وفـوق ذا ثقـل طينـه

ياللي عبيده تطلبـه ثـم ترجيـه
أعطف على عبدك وقـوّه بدينـه

وإلا الردي ما همني وش يجي فيه
لو غاب ما همب العرب فاقدينـه

لا واحسافه كيف يصبح مساويـه
النذل والطيّب سـوى بالسفينـه

مواقـف الطيّـب تعـزه وتغليـه
وإلا الـردي لعـل ربـي يهينـه

أشكي على اللي شامخات هقاويه
أبو محمـد جعـل ربـه يعينـه

مواقفـه هالحيـن وإلا بماضيـه
ترفع له البيضاء على أعلى جبينه

اللي يلبـي كـل صـوت يناديـه
رجل المواقـف كلنـا عارفينـه

إليا لفى كـل الجماعـة تحييـه
أحد يحب الخشـم وأحـد يدينـه

من حشمته كـل يحبـه ويغليـه
أبو محمد جعـل يبطـي ونينـه

أقول كلمة حق والله مـا أرجيـه
أرجـي كريـم كلنـا عابريـنـه