حازم النجم / البير

يبـــلاك ربّي فـــوق بلواك يـا بير ... يا اللي تعوف صويحبٍ ما ارتوى بك

تــوٍّ خـَفـَرتك سـاهر العين ما حِير ... تــوّ الـقــلب يــا بــير حَــط وثوى بك

كيــف الصـداقة تبـيعهــا بالمهاتير ... مــا قـُلت بي حـاجـة على زود ما بك

ترى الوعد ما يْعوز كل حين تذكير ... نســيان اشـوفك والوفــا ما عنى بك
********
تـَلـَيت من قافي على مسمعك خير ... من عـقب وحشــة كـاينة مِــن عذابك

وبحجّـتي يــامــا لفوا لك مســـايير ... غـدَيت رَبعــة وْقــام سْــرد الهلا بك

البّـن يـرهي كيف راس الخطاطير ... وْ كـَن عـطـّر التـنباك مَســلك جْنابك

زاروك ذِرْبيــن اليُــمـن والمناعير ... اللــي لهـــــم ردّات يـــوم المْـعَـابـَك

خاشروا جوضك واردفوا للمسايير ... ويــاما غـدى يا بير صوت الحِدا بك
********
وش شفت منـّي بالمواجيب تقصير ... حتى فــديت وْعــافني مَــن حـكا بك

ويـــا ليت حُـشنا حقنا مْــن الدنانير ... حــق الجْهـــود اللي كـَلاهــا جَـنابك
********
ردّ الجليـب وقــال : يــا ربّنا تـْجير ... جــانــي عــتابك مـير دوني عـتابك

اعتب على اللـــي باحش ٍ للمطامير ... ينسِــل عذاريب الخطا من صوابك

واعتب على اللــي بالفعل ماله كبير ... ما يْســد ســـدّات الرجـا في غيابك

واعتب على اللـــي يبدْلـَك بالغنادير ... مِدهالـــه بْشـــوك الجهالـــة تِشابَك

كـُــود الوســـايط وَدّها عُــرفٍ يْدير ... ورفـقـة الساعة ما تـْوافق حسـابك

دلـــو ٍ بليـّا مـُـقـط مـــا ينضـح البير ... وبـيــر ٍ بـليـّا مـــاه خيــّب شرابك

والديرة اللـي عــوقها مْـــن المخاتير ... ليتــك بــــلاها ولـو تـبـيعن ثيابك
********
قلت العجب يا بير وش تحسب الغير ... ليت الحـْديّة تصيح بـاوّل خرابك

ويـا لـــيت ظـلينــا علـى قصة الزير ... وْ لا جابنــا عا وقــفة الــذل بابك